Ingeborg Fischers Stoßseufzer zu Weihnachten

von Ingeborg Fischer

Iwwerall an Ecke unn zwische de Häuser
Sieht mer bärtische Nikeläuser.
Uff jeder Gass en leuchtende Baum
Des erträäscht mer werklich ehrlich kaum! 

Schon widder soll mer kreativ sei!
Schon widder fällt ahm gar nix ei!
Trotzdem muss mer Geschenke kaufe
Dorsch Geschäfte renne, sich die Hacke ablaufe. 

Iwwerall Kerze unn Glöckscher-Gebimmel
Fer de Babba en Schlips unn e Flasch Schlitzer Kümmel
Die Kinner krien Geld odder en Gutschein geschenkt
Unn ich bin sicher, dass an  m i c h widder gar kaaner denkt

Die Zeit, sie rennt, es is gewiss
Wie schnell`s plötzlich Heilisch Awend is. 

Butter- Plätzjer unn „Heilige Nacht“
In der – wie bekannt is – der „Oh-wie“ lacht.
Vom Gänsebrate bläht sich de Bauch
Unn zugenomme haste ganz sicher auch! 

Net mehr lang, dann isses widder so weit:
Oh, Du selige Weihnachtszeit.